Tamedyazt: « a Taqvaylit » Sɣur Muḥend Urezqi Buεam

Kem ur d-tusiḍ si mekka
Yak yemma-m d taqbaylit
Aẓar-im si dihya
Si terga n tgelda ssew-it
Ur ttasem si tgerfa
Ur ttaɣ lqid s talwit
Udem-im d lεib ur yella
Deg-m iseɣ d lḥerma
D umennuɣ n yal talit

Ayen akka a tefreḍ allen-im
Tid nni ar yetran cubaɣ
Yal mi ara thedder tsusmi-m
Di tmuɣli-m i d as-selleɣ
Qqen azmumeg i yimi-m
D tiziri i d-iteffeɣ
Seg-m ara d-tejbu tlelli-m
Kkes leḥjab i wudem-im
S teqbaylit i kem-ḥemmleɣ

Bru i ujellab acerqi
D tebrek i kem-yurzen
Ddem tafsut d tirni
Aman d yiṭij ma mlilen
Am teslit-nni igenni
Am teḍsa n ijedjigen
Rnu afzim ɣef yiri
S sser n tqendurt-nni
D tageldunt ad d-yefriren

I wumi aneḍlu qeḍran
Ur ttegg lqid i tayri-m
A yaggur si ger yetan
Seg igenni ẓẓel-d afus-im
S teqbaylit nek i kem-ibɣan
Ḥemmel-iyi s teqbaylit-im
Ur necqi deg wid ur yebɣan
D wid isengren imɣan
Di tefsut tezga tunt-im

Buεam Muḥend Urezqi